Serokê Herêma Kurdistanê Nêçîrvan Barzanî biryarnameya hilbijartinên parlamêntoya Kurdistanê îmze kir.
Serokatîya Herêma Kurdistanê ragîhand ku dê hilbijartinên parlamêntoya Kurdistanê 10 ê hezîrana sala 2024 a bên kirin.
Li gorî daxuyanîya serokatîyê, Nêçîrvan Barzanî ferman daye ku hilbijartinên serdema şeşan yên parlamêntoya Kurdistanê 10 ê hezîrana sala 2024 a bên encamdan.
Li gorî biryarnameyê, divê hemû alî hevkarîyê bi lijneya bilind ya serbixwe ya hilbijartinan ya Îraqê re bikin û berpirsîyarîyên xwe bi cîh bînin.
Çi bûbû?
Biryar hatibû dayîn ku hilbijartinên parlamêntoya Kurdistanê sala 2022 a çirîa pêşin bên kirin.
Lê ji ber nakokîyên di navbera Partîya Dêmokrat ya Kurdistanê (PDK) û Yekîtîya Niştimanî ya Kurdisyanê de (YNK) ev hilbijartin hatibûn taloqkirin û dema peywira parlamêntoya Kurdistanê salekê hatibû dirêjkirin.
Dadgeha fêdaral ya Îraqê gulana sala 2023 a biryar da ku dirêkjirina dema peywira parlamêntoya Kurdistanê ne yasayî ye.
Serokê Herêma Kurdistanê Nêçîrvan Barzanî piştî vê yekê biryar da ku hilbijartin 25 ê sibata sala 2024 a bên kirin.
Ji ber ku dadgeha fêdaral ya Îraqê gilîyên li ser “kotayên pêkhateyan” û “Yasaya hilbijartinan ya parlamêntoya Kurdistanê” dinirxandin pêvajo rawestiyabû.
