Bi biryara dadgeha Stenbolê 6 rojnamegerên ku hatibûn desteserkirin bi hînceta “endamtiya rêxistinê” hatin girtin.
Polîsan serê sibeha 17 ê kanûna paşin ya sala 2025 a di çarçoveya lêpirsîna serdozgeriya komarê ya Stenbolê de li Stenbolê, Wanê û Mêrsînê bi ser hinek malan de girtibû.
Di encamê de rojnameger Nêkla Dêmîr, Rahîmê Karvar, Ahmed Gyûnêş, Welat Ekîn, Vêdat Oruç û Rêyhan Hacîoglu hatibûn desteserkirin.
Polîsan di çarçoveya heman lêpirsînê de li navçeya Beyogluyê ya Stenbolê bi ser navendên Marti Production և Guncel Production de girt û dest danî ser kompîter û hard dîskên her du ajansan.
Li gorî ajansa Mezopotamyayê, piştî karûbarên lêpirsînê hêzên ewlehiyê rojnameger Nêkla Dêmîr, Rahîmê Karvar, Ahmed Gyûnêş û Welat Ekîn birin dadgeha Çaglayanê ya Stenbolê.
Her wiha Rêyhan Hacîoglu ya di encama heman lêpirsînê de li Wanê hatibû desteserkirin û Vêdat Oruç yê ku li Mêrsînê hatibû desteserkirin bi rêya sîstema SEGBÎS ê beşdarî dozê bûn.
Dadgeha Stenbolê bi hînceta “endamtiya rêxistinê” derbarê her 6 rojnamegeran de biryara girtinê da û ew şandin girtîgehê.
Di dozê de nûçe û bernameyên ku rojnamegeran çêkirine jî wekî tawan hatine hesibandin.
