Karbidestan ji Reuters re gotine ku serokê Amêrîkayê Donald Tramp wê li qesira Sipî pêşwazîya rêberên Ermenîstanê û Adirbêcanê bike, û civîn wê bi îmzekirina peymaneke çarçoveya aşîtîyê bi dawî bibe ku mafên taybetî yên Amêrîkayê yên li ser korîdoreke stratêjîk ya transîtê di nav Kafkasîyaya Başûr re dihewîne.
Dezgeha medyayî tekez dike ku peymaneke çarçoveya aşîtîyê dikare Başûrê Kafkasîyayê, ku herêmeke hilberînerê ênêrjîyê ye û sînorê wê bi Rûsyayê, Avropayê, Tirkîyayê û Îranê ve ye, bi borîyên pêtrolê û gazê ve hatîye dorpêçkirin lê bi sînorên girtî û pevçûyînên êtnîkî yên demdirêj veqetandî ye, biguherîne.
Karbidestên amêrîkî, bêyî ku navê wan bê eşkerekirin, gotine ku serokkomarê Adirbêcanê Îlham Elîyêv û serokwezîrê Ermenîstanê Nîkol Paşînyan li qesira Sipî ji bo hevdîtin û merasîma îmzekirinê tevlî Tramp bibin.
Rayedaran gotine ku tê payîn ku ew belgeyeke çarçoveyî îmze bikin ku armanc dike “rêyeke berbiçev ya aşîtîyê” bi dest bixe û pirsgirêka transîtê ya demdirêj çareser bike.
Reuters ê nivîsîye: “Adirbêcanê korîdoreke veguhastinê ya bi rêya Ermenîstanê xwestîye ku piranîya axa wê bi Naxçêvanê, enklaveke adirbêcanî ya ku sînorê wê bi Tirkîya hevalbendê Bekûyê re ye, girêbide.
Li gorî beşek ji belgeyên ku wê ji hêla rêberan ve bên îmzekirin, ku bi baldarî hatine danûstandin, Ermenîstan plan dike ku mafên pêşkeftina taybetî yên taybetî ji bo demek dirêj li ser korîdora veguhastinê bide Dewletên Yekbûyî, ku wê wek “Nexşerêya Tramp ji bo aşîtîyê û serfirazîya navneteweyî” bê binavkirin û wê bi kurtenava TRIPP bê zanîn.
Karbidestan gotine ku rê wê li gorî qanûna Ermenîstanê bê xebitandin û Dewletên Yekbûyî wê erdê ji bo binesazî û rêveberîyê bide konsorsyûmekê.
Rayedarekî gotîye: “Ev gav wê herêmê ji hêla bazirganî veke û rê li ber çalakîyên leşkerî yên din bigire”.
Wana destnîşan kirine ku rêberên Ermenîstanê û Adirbêcanê wê belgeyên ku daxwaza hilweşandina Koma Mînskê dikin, ku ji damezrandina wê sala 1992 a ji hêla Fransîyayê, Rûsyayê û Dewletên Yekbûyî ve bi hev re ji bo navbeynkarîya pevçûyînê tê rêvebirin, îmze bikin. Ajansa medyayê dinivîse ku pêşketina li ser pirsgirêka Ermenîstan-Adirbêcanê adarê de dest pê kirîye, dema ku nûnerê taybet yê Dewletên Yekbûyî Stîv Wîtkof serdana herêmê kiribû. Endamên tîmê wî ji hingê ve çend caran serdana wir kirine da ku îmzekirina peymanekê pêşve bibin.
Civîna qesira Sipî wê di heman rojê de pêk bê ku Tramp ji serokê Rûsyayê Vladimîr Pûtîn re destnîşan kirîye da ku gavên bidawîkirina dagirkirina Ûkraînayê qebûl bike yan jî bi cezayên aborî yên din re rû bi rû bimîne.
