Bi beşdarîya hejmareke kurdnasa, zimannasa û lêkoleran, konferansa kurdnasîyê li zanîngeha amêrîkî ya Silêmanîyê tê lidarxistin.
Konfêrans wê 3 rojan bidome ku hejmareke çalakîyên hunerî û pêşangehên pirtûkan jî li xwe digire.
Bi amadebûna hejmareke nivîskar û lêkolînerên kurd û bîyanî li zanîngeha amêrîkî ya Silêmanîyê, konfêransa kurdnasîyê dest pê kirîye.
Konfêransê de li ser ziman, sîyaset, çand û civaka kurdî gotûbêj tên kirin.
Serokê zanîngeha amêrîkî ya Silêmanîyê Bîlal Wehab li ser armanca konfêransê ji nûçegîhanê Rûdaw ê Pêşewa Bextyar re ragîhandîye:
“Hevdîtin ji bo danasîna navenda Keşkolê ya li zanîngeha amêrîkî ye ku şaheserên edebî yên kurdî wergerandine zimanên cîhanî, bi taybetî jî îngilîzî”.
Bîlal Wehab anîye ziman:
“Armanca me ew e ku em nifşekî nû yê kurdnasan bidin nasîn ku ew bi xwe kurd in û kurdnasîyê vedigerînin kurd û Kurdistanê, da ku em ji çavê xwe ve mijarên kurdî bi derve bidin nasîn”.
Serokê zanîngeha amêrîkî ya Silêmanîyê Bîlal Wehab daye zanîn ku zanîngeh girîngîyeke mezin dide gîhandina nifşekî nû û xizmetkirina civakê û daye zanîn:
“Lewra ji bilî mijarên akadêmîk, 7-8 pêşangehên hunerî û pirtûkan di konfêransê de bi rê ve diçin ku tê de 20 nivîskarî zêdetir pirtûkên xwe belav dikin”.
Bîlal Wehab her wiha destnîşan kirîye ku konferans wê 3 rojan bidome û di roja dawî de jî, wê konsêrek ji alîyê komeke hunerî ve bê lidarxistin.
