Ofîsa hevahengîya kar û barên mirovî ya Neteweyên Yekbûyî karwaneke nû yê alîkarîya mirovî yê ku ji 27 barhilgiran pêk tê şandîye Kobanîyê.
Di nav barhilgirên alîkarîyê de xurek, doşek û kel û pelên din hene.
Her wiha ji bo nexweşxane û stasyonên avê jî sotemenî hatîye şandin.
Ofîsa hevahengîya kar û barên mirovî ya Neteweyên Yekbûyî li ser mijarê daxuyanîyek belav kirîye û dîyar kirîye ku karwaneke alîkarîya mirovî yê ji 27 barhilgiran pêk tê derbazî herêmê bûye.
Di daxuyanîyê de wiha hatîye gotin:
“Di nav wesayîtan de kel û pelên bijîşkî û tenduristîyê, xurekên bingehîn, kel û pelên din yên alîkarîya mirovî û sotemenî hene.
Ev alîkarî ji bo piştgirîya pêdivîyên mirovî yên zêde yên li herêmê hatîye şandin”.
“Ev karwanê sêyem e”
Di daxuyanîyê de hatîye destnîşankirin ku kel û pelên bijîşkî û sotemenî ji bo berdewamîya xizmetên tenduristîyê gelekî girîng in.
Hatîye dîyarkirin ku wê sotemenîya hatîye şandin ji bo berdewamîya karê nexweşxane, stasyonên avê û xizmetên din yên bingehîn bê bikaranîn.
Her wiha hatîye gotin ku ev karwanê alîkarîyê yê sêyem e ku bi hevahengîya Neteweyên Yekbûyî û bi hevkarîya sazîyên fermî û rêxistinên civaka sîvîl tê organîzasîyakirin.
Ofîsa hevahengîya kar û barên mirovî ya Neteweyên Yekbûyî ragihandîye ku ji bo dema bê plansazîya şandina karwanên nû yên alîkarîyê heye lê heta niha ji bo dema şandina wan salnameyeke tekez nehatîye dîyarkirin.
