Fermandarê Giştî yê Hêzên Sûrîya Dêmokratîk (HSD) dibêje: “Kuştina jin û zarokan û destdirêjîkirina li ser sembolên olî tawanên li dijî mirovahîyê û nirxên Sûrîyayê ne”. Amajeyê jî dide: “Piştî 14 salên şer, dem hatîye ku xwînrijandin li Sûrîyayê bê rawestandin”.
Fermandarê Giştî yê Hêzên Sûrîya Dêmokratîk (HSD) li ser hesabê xwe yê tora civakî ya X ê nivîsîye: “Em li Sûvêydayê bang ji gelê xwe werdigirin, ji bo peydakirina rêyeke ewle ji sîvîlan re û rawestandina êrîşan”.
Fermandarê Giştî yê HSD ê amaje jî daye: “Kuştina jin û zarokan û destdirêjîkirina li ser sembolên olî tawanên li dijî mirovahîyê û nirxên Sûrîyayê ne, lema divê ev kiryarên şerxwazane yekser bên rawestandin û lêkolîn bi berpirsîyaran re bên kirin”.
Mezlûm Ebdî ronî jî kirîye: “Piştî 14 salên şer, dem hatîye ku xwînrijandin li Sûrîyayê bê rawestandin. Sûrîya wê ne bi tolhildanê, lê bi danûstandinan û hevfêmkirinê pêş bikeve”.
Navbirî tekez jî kirîye:“Pirsa gelê me yê Dirûz pirseke neteweyî ye û divê çareserîya wê bi rêya destûra welat û dîyalogê be”.
Ji 13 ê tîrmeha sala 2025 a ve, li parêzgeha Sûvêydayê ya Sûrîyayê di navbera eşîrên çekdar yên Dirûz û Bedewîyan de şerên dijwar qewimîn.
Rewangeha sûrîyayî ya mafên mirovan jî pêştira gotibû: “Piştî revandina ciwanekî Dirûrz li ser rêya sereke ya ku Şam û bajarê Sûvêydayê bi hev ve girê dide, tundûtûjî li parêzgeha Sûvêydayê zêde bûye”.
Wezîreta Bergirîyê ya Sûrîyayê jî hêza leşkerî şandîye wê deverê da ku wan girjîyan kontrol bike.
