Li gorî zanyarê sîyasî Tîgran Grîgoryan, ev hilbijartin dîroka Ermenîstanê de ji ber xwezaya xwe ya jêopolîtîk bêhempa ne, ku tê de lîstikvanên navxweyî û bîyanî xwedî tercîhên zelal in.
“Ev hilbijartin xuya dikin ku di dîroka Ermenîstanê de yekem hilbijartinên jêopolîtîk-navendî ne. Ev jî tê vê wateyê ku hemû aktorên sereke yên navxweyî xwedî tercîhên sîyaseta der ne”.
Grîgoryan behsa tercîhên hêzên der kirîye û destnîşan kirîye ku helwestên him Rûsyayê û him jî yên Rojavayê pir zelal in.
“Di derbarê Rûsyayê de, erê, tercîhên Rûsyayê di demên dawî de xuya ye ku eşkere bûne. Delîla here berbiçev ya vê yekê civîna Pûtîn-Paşînyan bûye, ku di wê demê de serokê Rûsyayê li ser hêzên alîgirê Rûsîyayê axivîye û bi gelemperî îşaret bi kê kirîye. Di demên dawî de, heger berê wekhevî kêm-zêde hebûya, niha ku hêza Samvêl Karapêtyan xuya dike ku dibe hêza sereke ya opozîsyonê, Rûsya hewil dide ku piştgirîyê bide wan”.
Li gorî wî, di mijara Rojavayê de piştgirî bi awayekî cuda tê nîşandayîn: “Her tişt di mijara Yekîtîya Avropayêda û Dewletên Yekbûyî de jî eşkere ye. Bê guman, Yekîtîya Avropayê bi nivîsa raste-rast îlan nake ku ew piştgirîyê dide hêza serdest, lê hin tevger û gavên dîyarkirî nîşan didin ku ev piştgirî heye.Rastîya ku bûyerên ewqas girîng tenê mehek berî hilbijartinan diqewimin-civîna civaka sîyasî ya Avropayê û her weha yekem civîna Yekîtîya Avropayê-Ermenîstanê di dîrokê de-ev jî amûrên piştgirîyê ne ji bo hêza serdest. Lê belê, divê tevgerên weha bi amûrên ku ji hêla Rûsyayê ve têne bikar anîn neyên danîn. Ew bi wê yekê cuda ye ku Yekîtîya Avropayê, berî her tiştî, beşdarî çalakîyên zirardar nabe, ango dêzînformasîyonê belav nake, hewil nade ku rewşeke kaosê li welêt biefirîne, êrîşên sîber pêk nayne”.
