Zanayên sîyasî li ser serdana Vêns bo Ermenîstanê û encamên civîna Paşînyan-Elîyêv li Abû Dabîyê axivîne
Ermenîstanê di salên dawî de têkilîyên xwe bi Dewletên Yekbûyî re pêş xistine: heger di destpêkê de peymana hevkarîya stratêjîk hatibû îmzekirin, niha hevkarîyeke pir mezintir û bê mînak kûrtir xuya dike.Avakirina aşîtîyê di navbera Ermenîstanê û Adirbêcanê de jî ji bo Dewletên Yekbûyî pêşînîyek e.
Li gorî “Armenpress” ê, ev nêrîn ji alîyê zanyarê sîyasî, serokê rêxistina nehukumî “Konsêya ermenî” Arêg Koçînyan ve hatîye nîşandan, ku behsa encamên serdana cîgirê serokê Dewletên Yekbûyî Vênse bo Ermenîstanê û her wiha civîna serokên Ermenîstanê û Adirbêcanê li Abû Dabîyê kirîye.
Koçînyan gotîye:”…ku di mentîqa pêşveçûna têkilîyên Ermenîstan-amêrîkî de faktora herî girîng e. Rêwêrzên nû têne zêdekirin, yek ji wan hevkarîya leşkerî-têknîkî ye, bi veguhestina çekên herî dawî. Û projeya TRIPP şahîdîya piştgirî û tevlêbûna Dewletên Yekbûyî ye, ji nû ve piştrastkirina pêşînîya wê ye. Daxuyaniyên qesira Sipî yên di derbarê serdana cîgirê serok Vêns de jî şahidîya vê yekê dikin”.
Zanyarê sîyasî Robêrt Gêvondyan destnîşan kirîye ku derfetên nû ji bo Ermenîstanê tên efirandin, lê li gorî wî, berî çend salan, ne mimkûn bûye ku meriv xeyal bike ku hevkarîyeke ewqas mezin di navbera Komara Ermenîstanê û Dewletên Yekbûyî de hebe.
Gêvondyan gotîye: “Dewletên Yekbûyî xwedî têknolojîyên herî pêşketî yên cîhanê ne, ji ber vê yekê Ermenîstan ji peymanek bi wê re di rewşek sûdmend de ye. Di derbarê projeya TRIPP de, ew derfetek peyda dike ku her du beşên Adirbêcanê bi hev ve girêbide, di heman demê de pênc prînsîbên sereke yên ku Ermenîstanê li dora wan xeta sor ji xwe re çêkiribû biparêze. Serdana cîgirê serok Vêns ne tenê ji hêla sembolîzmê ve, lê di heman demê de ji hêla qonaxa pêşveçûna têkilîyên dualî ve jî dîrokî bûye. Leza hevkarîyê ya bi vî rengî bi rastî bêhempa ye”.
Zanyarê sîyasî Samvêl Mêlîksêtyan destnîşan kirîye ku serdana cîgirê serokê Amêrîkayê bo Ermenîstanê nîşan dide ku rêveberiya nû ya Amêrîkayê bi awayekî çalak beşdarî pêvajoya normalîzasîyakirina têkilîyên Ermenîstanê-Adirbêcanê dibe û her wiha bi awayekî cidî eleqedar e ku têkilîyên dualî yên bi Ermenîstanê re pêş bixe.
Mêlîksêtyan gotîye: “Ji bo çareserkirina hemû pirsgirêkên heyî yên di warê nîvkondûktor, hevkarîya navokî û leşkerî-têknîkî de, rêveberîya nû ya Dewletên Yekbûyî bi rastî îradeyek nîşan dide û amade ye ku bi lez leza hevkarîyê pêş bixe.Avakirina rêaktorek nû ya modûlar tê wateya karanîna têknolojîyên pêşkeftî, ku bi saya wan rêaktorên weha bêhevseng ewletir in. Bi saya van hemûyan, em ê garantîyên hevkarîya demdirêj hebin. Ev yek dê di rewşên mezinahîya hêzan de jî bihêle ku em bikevin bazara sotemenîya navokî ya amêrîkî”.
Bi ya wî, projeya TRIPP rê dide veguhestina beşek ji rêveberîya rîskê bo Dewletên Yekbûyî, ku garantîyên ewlehîyê peyda dike, veberhênanan tîne û her weha girêdana di navbera welatên herêmê de di çarçoveya projeyên veguhastin û ênêrjîyê de mîsoger dike.
Axaftvanan her wiha behsa civîna serokên Ermenîstan û Adirbêcanê li Abû Dabîyê kirine. Koçînyan destnîşan kirîye ku pêşxistina hevkarîya zêdetir di danûstandinên Paşînyan-Elîyêv de roleke sereke lîstîye.
Koçînyan gotîye:”Her ku têkilî cûre-cûre bibin, ew qas ji bo Ermenîstanê çêtir dibe.Ne mesele ew e ku bi tevahî bi Adirbêcanê ve girêdayî bibe, ev wê xeletîyek mezin be. Mesele ew e ku têkilî cûre-cûre bibin. Ermenîstan welatekî îxraçkarê êlêktrîkê ye û ênêrjîya atomî dibe qada ku hevkarîya Ermenîstan-Amêrîkayê lê xwîn û goşîyet digire”.
Robêrt Gêvondyan destnîşan kirîye ku Ermenîstan, bi alîkarîya têknolojîyên amêrîkî û bi hevkarîya herêmî, hewl dide ku şîyanên xwe di sêktora ênêrjîyê de, ku ev jî pêşketinê nîşan dide, veguherîne, ji ber vê yekê, di vî warî de, civîna Paşînyan-Elîyêv li Abû Dabî pir bi bandor bû.
Gêvondyan gotîye: “Heger hevkarîya herêmî bi heman leza berdewam bike, di dawîyê de ew ê bibe sedema ku Ermenîstan sêktora xwe ya ênêrjîyê cûre-cûre bike, encamên cidî bi dest bixe. Û projeya TRIPP di qonaxa yekem de wê bibe mînakek pir girîng ya hevkarîya navneteweyî ku di encama çalakiyên çalak yên Adirbêcan, Ermenîstan û Dewletên Yekbûyî de, wê wekî mînak bê hesibandin, nemaze ji bo wan welatan ku di navbera wan de pevçûn hebû, ango ev rewşa nû dibe ku ji bo herêmên din jî tîpîk be”.
Mêlîksêtyan, di berdêla xwe de gotîye ku Dewletên Yekbûyî bi hinardekirina çavkanîyên cûre-cûre ji Asyaya Navîn bi rêya Adirbêcan û Ermenîstanê re eleqedar e, ku ev yek tê vê wateyê ku divê ragîhandinên nû werin çêkirin, her wiha di nav axên Adirbêcanê û Ermenîstanê re jî derbaz bibin.
Mêlîksetyan gotîye:”Di vî warî de, rola axa taybetî ya Ermenîstanê bi girîngî diguhere.Heger berê ragîhandinbûn ji bakûr derbaz dibûn, ji niha û pê ve ew ê ji axa Ermenîstanê û Adirbêcanê jî derbaz bibin. Ev guhertineke pir girîng û pratîkî ye, ku derfetê dide me ku em bibin welatekî transît û ji çavkanîyên nû çavkanîyan werbigirin, ku ev jî wê veberhênanan bîne û pêşkeftina pêşerojî mîsoger bike”.
