Rojnameya Brussels Times ê ragîhandîye ku darizandina çekdarê DAIŞ ê yê bêlçîkî Sêmî Jêdou, ku bi navê Ebû Musab el-Bêlgîkî, Musab el-Bêlgîkî jî tê nasîn, wê roja pêncşemê li dadgeheke jurîyê ya bi zimanê fransîaxêv li Bruksêlê dest pê bike.
Sêmî Jêdu, ku bi nebûna dadgehê tê darizandin, sala 2012 a de çûye Sûryayê û venegerîyaye. Heger hîn sax be, temenê wî wê 35 salî be. Ew sala 1989 a li Brusêlê ji dayik bûye.
Dozgeriya fêdêral, ku 12 ê cotmeha sala 2021 ê de doz li dijî Jêdu vekirîye, ewî bi jênosîdê tawanbar dike. Jêdu k di navbera 2 ê tebaxa sala 2014 a û 14 ê nîsana sala 2019an de li dijî hejmareke nediyar ji endamên civaka êzidî kuştin û sûcên din yên giran kiriye.
Ew zilam her wiha bi tecawizkirin û kolêtîya sê kesan di navbera 1ê mijdara sala 2014 a û 31 ê kanûna pêşîn ya sala 2016 a de tê tawanbarkirin.
Ev hersê qurbanî, ku hin ji wan di dema sûc de di bin temenê biçûk de bûn, niha 29, 27 û 28 salî ne, û ew di vê dozê de wekî alîyên sîvîl tevdigerin.
Dudu ji wana li Almanyayê û Fransîyayê dijîn û wê ji roja pêncşemê pê ve li dadgehê amade bin. Doza li dijî Sêmi Jêdu yekem doza li Bêlçîkayê ye ku li ser qirkirina êzîdîyan e.
Holandîyayê, Almanyayê û Swêdê berê darizandinên bi vî rengî li dar xistine. Fransîya jî wê sala 2027 a de vê yekê bike. Pispor sê alîyên taybetmendîya qirkirinê nas dikin: kuştina mêran, tecawizkirina jinan wek rêbazek ji bo şer, û îstismarkirina zarokan wek leşker.
