Serokê Herêma Kurdistanê Nêçîrvan Barzanî 24 ê gulanê pêşwazî li du endamên encûmena Pîran (Sênato) ya Amêrîkayê, sênatorê serbixwe yê wîlayeta Mêyn Angûs Kîngê û sênatorê komarî yê wîlayeta Oklahoma Cêyms Lankfordê û şanda bi wan re kirîye.
Serokatîya Herêma Kurdistanê di daxuyanîyekê de ragîhandîye, di civînê de pêşxistina têkilîyên Îraqê û Herêma Kurdistanê li gel Amêrîkayê, hevkarîya hevbeş bi taybetî di warê rû bi rûbûna têrorê de, têkilîyên Hewlêr-Bexdayê, herwiha rewşa Îraqê û Herêma Kurdistanê hatine gotûbêjkirin û derbarê rewşa Sûrîyayê û pêşhatên navçeyê de nêrîn hatin guhartin.
Li gor daxuyanîyê, Nêçîrvan Barzanî spasî û pêzanîna xwe ji bo piştgirîya berdewam ya Amêrîkayê ji Îraqê û Herêma Kurdistanê re, bi taybetî piştgirîya Kongrêsê ji bo proseya çaksazîyê ya wezîreta pêşmerge anî ziman. Herwiha amaje bi girîngîya pêşxistina hevkarîyê di navbera wan de di warên cuda de kirîye.
Şanda mêvana pesinê pêşketinên Herêma Kurdistanê daye û amaje bi wê yekê kirine, Amêrîka bi girîngîyeke mezin û wek hevpeymanek li Îraqê û Herêma Kurdistanê dinêre. Di vî warî de, wana tekezî li ser berdewamîya pabendîya Amêrîkayê ji bo piştgirîya Îraqê û Herêma Kurdistanê kirîye.
